https://www.facebook.com/adoseofcath/videos/700492218307383/
៙សម្តីថា ស្ត្រីអត់សូវមានសិទ្ធិហ្នឹង គឺជាការថ្លឹងមិនស្មើទេ ព្រោះគាត់គិតតែសិទ្ធិដែលស្ត្រីអត់មាន តែមិនបានគិតពីសិទ្ធិដែលបុរសអត់មានដែរទេ។ ដំបូងឡើយ នៅសម័យសង្គ្រាមលោក សិទ្ធិបោះឆ្នោត កាលនោះ ភ្ជាប់មកជាមួយនឹងកាតព្វកិច្ចយោធា ហើយត្រូវមានដីជាកម្មសិទ្ធិ ម្ល៉ោះហើយ អ្នកដែលគ្មានដី ស្រីក៏ដោយ ប្រុសក៏ដោយ អត់មានសិទ្ធិបោះឆ្នោតទេ ហើយបុរសដែលបានបោះឆ្នោតលុះត្រាតែបំពេញកាតព្វកិច្ចយោធាជូនរដ្ឋ អ៊ីចឹងហើយ ស្ត្រីអត់មិនចង់ស្លាប់នៅសមរភូមិ ភាគច្រើន ប្រហែល ៧០ភាគរយ អត់ចង់បានសិទ្ធិបោះឆ្នោតទេ ហើយអ្នកខ្លះមិនទាំងខ្វល់ឆ្លើយតបផង ពេលគេចុះស្ទង់មតិថាចង់បានសិទ្ធិបោះឆ្នោតឬអត់។ នៅអាមេរិក កាលពីសតវត្សរ៍ទី១៩ ច្បាប់សហព័ន្ធទាមទារថា បើប្រពន្ធប្រព្រឹត្តបទឧក្រិដ្ឋ បុរសជាប្តីជាអ្នករងការកាត់ក្តីចំពោះបទឧក្រិដ្ឋរបស់នាង ហើយគាត់អាចជាប់ពន្ធនាគារទៀតផង បើគេរកឃើញថា នាងមានពិរុទ្ធភាព។ បើគ្រួសារជំពាក់បំណុល មានតែបុរសទេ ជាអ្នកសងជំនួស។ ត្រង់ណាទៅដែលបង្ហាញថា ស្ត្រីគ្មានសិទ្ធិ។
៙រឿងស្ត្រីទទួលបានប្រាក់ខែមិនច្រើននេះ មិនមែនមកពីគាត់ជាស្រីទេ គឺមកពីស្ត្រីច្រើនចាប់យកជំនាញដែលរកបានកម្រៃតិចជាងនិងសម្ពាធការងារតិចជាង ឧ. គិលានុដ្ឋាយិកា ជាជាង វេជ្ជបណ្ឌិត, បដិសណ្ឋារកិច្ច ជាជាង វិស្វកម្ម។ល។ នាងជ្រើសរើសយកការងារដែលមានលក្ខណៈបត់បែន និងក្រៅម៉ោង ឬចំនួនម៉ោងធ្វើការតិចជាង ជាលទ្ធផល គេមិនអាចឱ្យប្រាក់ខែយើងច្រើនជាង អ្នកដែលធ្វើការយូរម៉ោងជាងនោះទេ មិនថាយើងជាប្រុសឬស្ត្រី។
៙តាមពីតទៅ បុរសនិងស្ត្រីរៀបការ ដើម្បីបង្កើតកូន មិនមែនដើម្បីរស់រានតែមួយមុខទេ។ ស្រ្តីចិញ្ចឹមខ្លួនឯងរស់ ក៏គាត់នៅតែរៀបការដែរ បុរសមិនរៀបការក៏គាត់រស់បានដែរ។ ចំណែកភាពឯកា អ្នកនៅលីវឯកាជាងអ្នកមានគ្រួសារអ៊ីចឹងហើយ មិនមែនសម្រាប់តែបុរសទេ ស្ត្រីក៏អ៊ីចឹងដែរ។ ជាការណ៍ពិត តាំងពីបរមបុរាណមក មិនមែនទើបតែឥឡូវទេ បុរសឯកោជាងស្ត្រី គេដឹងតាមរយៈការផ្ទេរសែនតជំនាន់ ដែលការសិក្សាបង្ហាញថា មានតែបុរស ៤០ភាគរយប៉ុណ្ណោះ បានបន្តពូជ មានន័យថា គាត់មានដៃគូបង្តើតកូនឱ្យ, ៦០ភាគរយទៀត ឯកាគ្មានដៃគូទេ ស្ត្រីវិញ ប្រមាណ ៨០ ទៅ ៩០ភាគរយ បានបន្តពូជ។ បណ្តាញសង្គមប្រភេទណាមួយក៏ដោយ ឱ្យទិន្នន័យបែបនេះដូចគ្នាដែរ គឺស្ត្រីមានមិត្តច្រើនជាង មានគេផ្ញើសារ សុំធ្វើមិត្ត ចុចចូលចិត្ត ចុចបញ្ចេញមតិ…ច្រើនជាងគណនីបុរសឆ្ងាយណាស់។
៙ស្ត្រីនៅលោកខាងលិច ស្តង់ដាររបស់បុរសដែលគាត់ចង់បាន មិនមែនខ្ពស់ធម្មតាទេ គឺខ្ពស់កប់ពពក ម្ល៉ោះហើយ មានបុរសតិចណាស់ដែលត្រូវចិត្តគាត់ ធ្វើឱ្យស្ត្រីភាគច្រើននៅលីវ ព្រោះគាត់ដណ្តើមយកបុរសមួយក្តាប់តូច ទិន្នន័យពី Dating App ស្ត្រីនៅលោកខាងលិច ចុចយកតែ ២០ភាគរយប៉ុណ្ណោះ នៃបុរសសរុប។ សូម្បីតែស្ត្រីដែលអន់រូបសម្បត្តិសោះ ក៏គាត់ចង់បានបុរសគ្រប់លក្ខណៈដែរ គឺ ខ្ពស់ជាងគាត់ មិនធាត់ រកចំណូលបានច្រើនជាងគាត់ មានឡាន មានផ្ទះ ស្មោះត្រង់នឹងគាត់ អត្តចរិតល្អ…បុរសប្រភេទនេះច្រើនជាប្តីគេ ឬមានគូកំណាន់ហើយ។ នេះជាមូលហេតុដែលប្រហាក់ប្រហែលនៅស្រុកយើង ឧស្សាហ៍ឮព័ត៌មានស្រ្តីដណ្តើមប្តីគេ ញឹកញាប់ជាង បុរសដណ្តើមប្រពន្ធគេ និងរឿងជះទឹកអាស៊ីតជាដើម។
៙ស្ត្រីជ្រើសរើសនៅលីវ ដោយសារជាជម្រើសរបស់គាត់ ត្រឹមត្រូវតែចំពោះស្ត្រីវ័យជំទង់ ពី១៨ឆ្នាំទៅ ២៥ ទេ។ អាយុក្បែរ ៣០ ដល់ ៣៥ឆ្នាំទៅ គាត់ស្រវារកប្តីហើយ ដោយសារលទ្ធភាពបង្កកំណើតកាន់តែថយចុះ ចាប់ពីក្រោយអាយុ ៣០ឆ្នាំទៅ។ អ៊ីចឹង គាត់និយាយថា ស្ត្រីជ្រើសរើសនៅលីវ ត្រូវតែមួយភាគទេ។
តាមស្តាប់ទៅ គាត់និយាយបាត់មូលហេតុសំខាន់ៗច្រើន និងនិយាយតាមរបៀបគិតរបស់មនុស្សស្រី មិនបានគិតពីរបៀបគិតរបស់មនុស្សប្រុស៖
ស្ត្រីលោកខាងលិច នឹងនៅលីវ មិនមែនត្រឹមតែមកពីគាត់ចង់នៅលីវទេ គឺមកពីបុរសមិនចង់បានគាត់ដែរ ហើយមូលហេតុមានច្រើនទៅទៀត ដូចជា
៙បុរសមិនចង់បានម៉ែប្រពន្ធទេ។ ស្ត្រីដែលមានឯករាជ្យផ្នែកហិរញ្ញវត្ថុ ខ្លះ មានចរិតជាចៅហ្វាយស្រី និងប្រកាន់គំនិតថា មិនត្រូវការបុរស។ បុរសមិនដែលចង់បានប្រពន្ធ រួចរក្សាផ្នត់គំនិតមិនត្រូវការស្ត្រីទេ តែស្ត្រីខ្លះបែរជារក្សាគំនិតមិនត្រូវការបុរសបែបនេះ ថាអត់ប្តីក៏រស់បាន។
៙ស្ត្រីលោកខាងលិច កម្រមានព្រហ្មចារី ដេកជាមួយបុរសច្រើននាក់ណាស់ ទម្រាំដល់ចង់បានប្តី បានដេកជាមួយបុរស ពី៣០នាក់ ទៅ៥០នាក់ អាចចូលដល់រយក៏មាន។ បុរសមិនចង់ឮសម្តីពីបុរសដទៃ ថា «បានដេកជាមួយប្រពន្ធគាត់ មុនការ រាប់ភ្លេច» នោះទេ ព្រោះប៉ះពាល់កិត្តិយសគាត់។ ជាពិសេស នៅពេលមានផ្ទៃពោះ គាត់មិនច្បាស់ថាជាកូនរបស់គាត់ឬអត់ ព្រោះនាងដេកជាមួយប្រុសដទៃច្រើនពេក។
៙ស្ត្រីលោកខាងលិចមិនចង់ធ្វើការងារផ្ទះ និងមិនចង់មើលកូន ចង់ផ្តោតលើអាជីពរបស់ខ្លួន រួចហើយចង់បានប្រាក់ចំណូលរបស់ប្តីទៀត ម្ល៉ោះហើយ បុរសមិនដឹងយកប្រពន្ធបែបនេះមកធ្វើអី បើគាត់ការហើយ នៅតែគិតគិតពីខ្លួនឯងដូចពេលនៅលីវ។
៙ស្ត្រីលោកខាងលិចកាន់តែច្រើនឡើង នាំគ្នារកលុយ តាម OnlyFan គឺជាគេហទំព័រលក់រូបអាក្រាតនិងសេវាផ្លូវភេទ បុរសមិនចង់បានស្រីប្រភេទនេះធ្វើប្រពន្ធទេ ត្បិតខ្លាចមានអ្នកស្គាល់ ដល់មានកូន ហើយកូនធំទៅ វារកឃើញរូបដោយចៃដន់ទៅ វីរវរហើយ។
៙មូលហេតុចម្បងបំផុតដែលយើងទុកនិយាយនៅគំរប់ចុងក្រោយ គឺលោកខាងលិច មានអត្រាលែងលះខ្ពស់ ដល់ ៥០ភាគរយ និងច្បាប់អាពាហ៍ពិពាហ៍អាក្រក់ ពោលឱ្យចំ គឺអាត្រាប្រពន្ធលែងប្តី ខ្ពស់។ ៧០ភាគរយនៃករណីលះលែង ៥០ភាគរយខាងលើ គឺប្រពន្ធជាអ្នកដាក់ពាក្យលែង បើប្រពន្ធនោះរៀនសូត្របានខ្ពស់ អាត្រានេះឡើងដល់ ៩០ភាគរយ។ ចំណែកតុលាការគ្រួសារ ច្បាប់អាពាហ៍ពិពាហ៍និងគោលនយោបាយពាក់ព័ន្ធ មានផលអាក្រក់សម្រាប់បុរសដែលសម្រេចចិត្តរៀបការ ដោយបុរសប្រឈមនឹងការបាត់បង់ទ្រព្យសម្បត្តិពាក់កណ្តាល ឬលើសនេះ ទៅឱ្យប្រពន្ធ កូន មេធាវី និងតុលាការ ដែលមេធាវីខាងប្រពន្ធហ្នឹង គឺប្តីជាអ្នកចេញថ្លៃជួលទៀត ហើយចៅក្រុមភាគច្រើនកាន់ជើងស្ត្រី ច្រើនផ្តល់សិទ្ធិចិញ្ចឹមកូនទៅស្ត្រី គួបផ្សំនឹងអត្រាលែងលះខ្ពស់ និងច្បាប់អនុញ្ញាតឱ្យលែងគ្នា ដោយមិនត្រូវការបុព្វហេតុ ឬគ្មាននរណាខុស ភាសាអង្លេសហៅថា no fault divorce ធ្វើឱ្យបុរសប្រថុយប្រថានខ្លាំង។ មានគោលនយោបាយរបស់រដ្ឋាភិបាល ឧបត្ថម្ភ ម្តាយនៅលីវ ដោយជំរិតយកប្រាក់ ពីអតីតប្តីរបស់គាត់ បើបង់មិនបាន ចាប់ដាក់ពន្ធនាគារ។ មានន័យថា ច្បាប់និងគោលនយោបាយទាំងនេះលើកទឹកចិត្តឱ្យស្ត្រីលែងប្តី ដើម្បីបានប្រាក់ពីប្តីឬពីរដ្ឋ។ សរុបមក នៅលោកខាងលិច បុរសនៅលីវ ឬជ្រើសរើសនៅលីវ ព្រោះស្ថានភាពសង្គមនិងនយោបាយនៅស្រុកពួកគេ មិនលើកទឹកចិត្តឱ្យពួកគេមានគ្រួសារ មានតែជំរុញស្ត្រីឱ្យបំផ្លាញគ្រួសារគាត់ និងជំរិតយកទ្រព្យសម្បត្តិរបស់គាត់។
មូលហេតុដែលសង្គមរិះគន់បុរសដែលធ្វើដូចស្ត្រី មិនមែនមកពីស្អប់ស្ត្រីទេ គឺមកពីតួនាទីប្រពៃណីខុសគ្នារវាងបុរសនិងស្ត្រី បើបុរសធ្វើដូចស្ត្រី នឹងមិនមាននរណាបំពេញនាទីជាបុរស។ បើបុរសមិនចូលចិត្តស្ត្រីទេ មិនមែនតាមញ៉ែស្រីឥតឈប់ ចំណាយប្រាក់ជាច្រើនរាល់ការណាត់ចួបដើរលេង បង់ថ្លៃទឹកដោះដ៏ថ្លៃ ទម្រាំបានការ មានសេវាកម្មកំសាន្តជាច្រើនអនុញ្ញាតឱ្យស្ត្រីទាក់ទាញរកប្រាក់ពីភ្ញៀវប្រុស។ល។
បុរសមានតួនាទីការពារនិងចិញ្ចឹមគ្រួសារ ក្នុងនោះរួមមានប្រពន្ធនិងកូន។ នៅពេលដែលគ្រួសារមានគ្រោះអាសន្ន គេរំពឹងឱ្យបុរសយកខ្លួនទៅពាំង ឧ. ពេលមានជនចម្លែកចូលផ្ទះ គឺបុរសជាអ្នកទៅឈរនៅមាត់ទ្វារ ទប់ទល់។ មនុស្សស្រីអាចកំសាក រត់យករួចខ្លួន រួចគ្មាននរណារិះគន់ទេ គឺភេទដែលមានកម្លាំងខ្លាំងជាងទេ ដែលគេរិះគន់។ នៅពេលប្រទេសមានអាសន្ន គេបញ្ជូនបុរសឱ្យទៅការពារទឹកដី មនុស្សស្រីទទួលបានការការពារ មិនបាច់ពលីជីវិត និងរស់លើទឹកដីដែលបុរសយកជីវិតទៅប្តូរ ឧ. ពេលទាហានស្លាប់ ទ្រព្យសម្បត្តិបានទៅគ្រួសារនិងប្រពន្ធគាត់។ គេមិនឱ្យបុរសស្លៀកពាក់ដូចស្រី គឺមកពីមិនចង់ឱ្យបុរសមានចរិតដូចស្រីនេះឯង តើបាននរណាការពារគ្រួសារនិងប្រទេស បើធ្វើជាស្រីទាំងអស់គ្នា។
Toxic Masculinity គឺជាបញ្ញត្តិដែលបង្ហាញថា ពួកស្ត្រីនិយមមិនយល់ពីបទពិសោធជាមនុស្សបុរស។ គាត់ជាមនុស្សស្រី គាត់អាចបញ្ចេញអារម្មណ៍ បង្ហាញទុក្ខលំបាក និងមិនចាំបាច់ប្រើហិង្សា ព្រោះបើប្រឈមនឹងជនទុច្ចរិត មានបុរសប្រើហិង្សាប្រយុទ្ធនឹងជននោះ ដើម្បីការពារគាត់។ ស្រ្តីគឺជាអ្នកពរពោះបង្កើតកូន ដូច្នេះការបង្ហាញទុក្ខលំបាក រអ៊ូរទាំ បញ្ចេញអារម្មណ៍ ចាំបាច់សម្រាប់គាត់ និងមានអ្នកខ្វល់ ព្រោះបើមានបញ្ហាអី ប៉ះពាល់ដល់កូន។ នៅពេលស្ត្រីត្រូវចោរឆក់កាបូប តើមានដែលឃើញស្ត្រីគ្នាគាត់ឡើងម៉ូតូដេញតាមចោរទេ។ បុរសវិញបើបញ្ចេញអារម្មណ៍ ស្រែកហៅរកគេជួយ មិនសូវមានអ្នកខ្វល់ ហើយក៏គ្មានស្ត្រីក្លាហានហ៊ានការពារបុរសដែរ។ សង្គមបង្រៀនបុរសឱ្យមិនបញ្ចេញអារម្មណ៍ មកពីខ្វល់ពីអារម្មណ៍របស់បុរសនោះឯង ពេលរស់នៅក្នុងព្រៃ សង្គមរំពឹងបុរសឱ្យប្រយុទ្ធនឹងសត្វសាហាវ ពេលរស់នៅសង្គមមានរដ្ឋ មានទីក្រុង គេរំពឹងឱ្យបុរស ប្រយុទ្ធការពារ តទល់នឹងការឈ្លានពាន។ ហេតុដូច្នេះហើយ ទើបវប្បធម៌ភាគច្រើន រំពឹងឱ្យបុរសរឹងមាំ មិនបញ្ចេញអារម្មណ៍ទន់ជ្រាយ ប្រើហិង្សា ព្រោះពួកគេជាអ្នករ៉ាប់រងបន្ទុកការពារគ្រួសារ សង្គម និងប្រទេសជាតិ គ្មាននរណាគេមានពេលរវល់នឹងអារម្មណ៍ ស្តាប់គាត់បូបាច់ពីការលំបាករបស់គាត់ ដូចស្រ្តីទេ។
ជារួម នៅពេលដែលបុរសគិតនិងធ្វើ ខុសពីស្ត្រី គាត់មិនយល់ថា បុរសមានបទពិសោធជីវិតខុសពីស្ត្រីទេ គាត់ទៅជាយល់ថា ភាពជាបុរសហ្នឹងតុកស៊ិចទៅវិញ។
៙ជាការណ៍ពិត ប្រទេសដែលគំនិតស្ត្រីនិយមឬអង្គការស្ត្រី មានឥទ្ធិពលខ្លាំង ប្រទេសនោះមានអត្រាលែងលះខ្ពស់។ អង្គការស្ត្រីជឿលើមនោគមស្ត្រីនិយម អ្វីដែលក្រុមស្ត្រីនិយមនិយាយពីមនុស្សប្រុស ច្រើនតែអវិជ្ជមាន គាត់និយាយធ្វើដូចបុរសទាំងអស់សុទ្ធតែហិង្សានិងស្រវឹងវាយប្រពន្ធ ស្របពេលប្តីភាគច្រើនមិនបានធ្វើដូច្នេះទេ។ តើមានប៉ុន្មានលើកទៅដែលយើងឮពួកស្ត្រីនិយម និយាយអំពីវិធីផ្សះផ្សារទំនាស់ក្នុងចំណងអាពាហ៍ពិពាហ៍? ដំណោះស្រាយរបស់គាត់ដឹងតែឱ្យលែងគ្នា ដឹងតែស្ត្រីត្រូវឈប់ទ្រាំ គាត់អត់ដឹងថា ប្រពន្ធខ្លះពូកែរករឿង ប្តីមកដល់ផ្ទះ រកស្ងាត់បន្តិចមិនបានទេ។ គាត់ចេះតែនិយាយថា បុរសមិនចេះគ្រប់គ្រងអារម្មណ៍និងមិនចេះដោះស្រាយបញ្ហា តាមពិតទៅ នៅលោកខាងលិច គឺស្ត្រីទេដែលមិនចេះគ្រប់គ្រងអារម្មណ៍ ដែលទាស់គ្នាបន្តិចបន្តួច ដាក់ពាក្យលែង គឺស្ត្រីជាផ្តួចផ្តើមលែងលះភាគច្រើន។ នៅទីនេះ យើងមិនសំដៅករណីប្តីចោលម្សៀត ធ្វើបាបប្រពន្ធទេ យើងនិយាយពីទំនាស់ធម្មតាក្នុងជីវភាពប្រចាំថ្ងៃ ដូចជា ប្តីស៊ីចាយខាងក្រៅ មិនសន្សំសំចៃ ដូចគ្នានឹងប្រពន្ធទិញរបស់តុបតែងខ្លួនត្រៀបត្រា។ ករណីដែលប្រពន្ធនៅផ្ទះ ពេញមួយថ្ងៃ មិនបានដាំបាយ មិនសម្អាតផ្ទះ រួចប្តីមកពីធ្វើការវិញ ប្រពន្ធមិនដឹងនៅឯណា។ ស្ថានភាពទាំងអស់នេះងាយនាំទៅរកទំនាស់ណាស់ យើងមកពីអង្គការណាក៏ដោយ គឺជាអ្នកក្រៅ មិនមែនទៅដល់ដឹងតែប្តីខុស ប្រពន្ធត្រូវទេ។
ជាយោបល់ សម្រាប់ប្រពន្ធ បើមានបញ្ហាក្នុងគ្រួសារ គួររកអ្នកក្នុងគ្រួសារ ឪពុកម្តាយខាងប្រុសនិងខាងស្រី ឱ្យជួយដោះស្រាយទំនាស់ប្តីប្រពន្ធ ចៀសវាងពឹងពាក់អង្គការស្ត្រីខ្លះ ដែលជឿស៊ប់លើមនោគមស្ត្រីនិយមខ្លាំង។ សម្រាប់បុរស រកគ្រប់មធ្យោបាយបាយផ្សះផ្សារ ដាច់ខាតរារាំងប្រពន្ធកុំឱ្យរត់ទៅរកអង្គការទាំងនោះ បើមិនចង់ឱ្យគ្រួសាររបស់ខ្លួនបែកបាក់៕
ទំព័រដួងចិត្តកវី 