អ្នកឆ្វេងអ្នកស្តាំ (Right and Left)

A Right-Brained Society

                                                                       

ខាងស្តាំខាងឆ្វេង                                 

ជាគូប្រជែង                               

ឆ្ពោះទិសផ្ទុយគ្នា

តែធម្មជាត                                            

បានកំណត់ជា                           

ដៃគូសាមគ្គា

ខ្វះគ្នាពុំបាន។

បើមានតែស្តាំ                                         

គ្មានអ្នកនៅចាំ                          

ដាស់តឿនរុញច្រាន

 ឬទប់បង្អង់                                            

រិះគន់រំខាន                               

ចួបគ្រោះពុំក្សាន្ត

ដ្បិតធ្ងន់តែម្ខាង។

បើមានតែឆ្វេង                                        

ប្រៀបស្មើសម្លេង             

រំខានការសាង

បង្អាក់ដំណើរ                                         

វល់តែត្រដាង                      

កំហុសគ្រប់យ៉ាង

ខ្លាចខុសជាងធ្វើ។

តែបើស្តាំឆ្វេង                                         

ផ្គួបផ្គុំសម្លេង                              

មើលទាំងក្រោមលើ

ភាពច្បាស់កើតមាន                                

ព្រោះពេញទង្វើ                           

គំហើញមិនទើរ

លើធ្នឹមមិនស្មើ។

ខាងស្តាំធ្វើសិន                                      

បើមិនសូវប៉ិន                             

ខាងឆ្វេងប្រមើល

មើលរកផ្លូវណា                                      

ចំរើនដំណើរ                              

ដើរឬមិនដើរ

បន់បែនឆ្វេងស្តាំ។

ស្តាំមិនសុទ្ធល្អ                                       

ព្រោះស្តាំបន្ត                              

គំនិតចំណាំ

ធ្វើច្រើនដដែល                                       

គិតកែយូរឆ្នាំ                              

មិនទទួលចាំ

គំនិតរិះគន់។

ឆ្វេងពុំសុទ្ធល្អ                                         

ព្រោះមិនបន្ត                              

ដំណើរពីមុន

ចាំតែថាខុស                                          

មិនជួយកែកុន                           

ពុំយល់ទំងន់

ការងារខាងស្តាំ។

ល្អឆ្វេងរិះគិត                                          

ស្តាំអ្នកប្រព្រឹត្ត                           

ស្របតាមពលកម្ម

ឆ្វេងស្តាំរួមគ្នា                                         

គោរពបណ្តាំ-                             

ធម្មជាតិ ត្រូវចាំ

ឆ្វេងស្តាំជាគូ៕

 —S. TAY, Finished writing, 00:32, Sat, 19/05/2012

                                                                                                                                               

 

អ្នកធ្វើ​អ្នក​ថា​

Doer, Knower and Sayer

អ្នកធ្វើអ្នកថា

មនុស្សពីរកាយា

ចរិតពីរប្លែក

ពិបាកយល់គ្នា

ព្រោះជំនាញចែក

មួយប៉ិនខាងស្រែក

មួយប៉ិនខាងធ្វើ។

អ្នកធ្វើតូចធំ

ពិសោធនិយម

ជាក់ស្តែងទង្វើ

មិនសូវស្មុកច្រើន

ធ្វើផ្អែកអំពើ

ទ្រឹស្តីល្ងីល្ងើ

តូចជាងអនុវត្ត។

ធ្វើច្រើនយល់ច្បាស់

ធ្វើលើក្រដាស

គង់មានភ្លាំងភ្លាត់

យល់ភាពបែនបត់

មានជំនាញស្ទាត់

ជាងបានតែមាត់

ដល់ធ្វើពុំកើត។

ពិសោធនិយម

កំហុសយ៉ាងធំ

គឺមិនបង្កើត

ពង្រាងលទ្ធផល

ពេលខុសបង់ខាត

សំណង់គ្រឹះបាត

ខាតមុនចំណេញ។

គិតហើយសឹមគូរ

ទ្រឹស្តីគំរូ

មុនអនុវត្តចេញ

ទើបធ្វើមិនរាវ

មិនខ្វាក់ពេញលេញ

បើមានខុសវិញ

ងាយរកកំហុស។

រីខ្វាក់ទាំងស្រុង

ខ្វាក់ទាំងក្រៅក្នុង

ខួរក្បាលមិនដុះ

ត្រចៀកមិនវៃ

ឈើច្រត់ប្រើខុស

ជើងដៃករកុះ

មិនប្រើឱយស្ទាត់។

ទ្រឹស្តីនិយម

កំហុសយ៉ាងធំ

គឺមិនអនុវត្ត

ឬបានតែថា

ពេលធ្វើចាកភ្លាត់

ទ្រឹស្តីពីមាត់

មិនស្មើគំនិត។

ទ្រឹស្តីអនុវត្ត

ដៃហើយនិងមាត់

មាត់ពោលចេះគិត

គិតស្មានឱយត្រូវ

ឱយដៃប្រព្រឹត្ត

បានទើបអ្នកគិត

សមអ្នកទ្រឹស្តី។

អ្នកធ្វើគិតគ្នេរ

បើត្រូវស្តាប់គេ

បើខុសកែខៃ

ចំរើនរួមគ្នា

គុណសម្បត្តិថ្លៃ

មិនទោរធ្លាក់លើ

បុគ្គលតែម្នាក់។

Mon, 17:02-17:59, 21/05/2012

កែវភ្នែក

                  

កែវភ្នែកពុំមែនសំរាប់តែ                                                   

ក្រលេកមើលទេទោះមែនក្តី

គេតែងប្រើស្របនឹងសម្តី                                                 

ចួនអាចជួសន័យពេលស្តីទៀត។

ពេលខ្លះមិនស្តីគ្រាន់ប្រើភ្នែក                                            

ដៃគូជជែកមិនបាច់ឆ្លៀត

អាចយល់អត្ថន័យគ្រប់កលស្នៀត                                     

អាចប្រើស៊កសៀតគូសត្រូវ។

រហូតដល់គេអាចសំគាល់                                                

ចិត្តបុគ្គលផ្ទាល់ផ្អែកតម្រូវ

លើភ្នែកស្មោះត្រង់ឬឃោឃៅ                                          

ចិត្តក្នុងរាក់ជ្រៅភ្នែកឱយន័យ។

បើប្រាសចាកភ្នែកសម្លឹងផ្សំ                                              

គេចោទចំៗគ្មានភក្តី

ទោះកាយវិការផ្សំសម្តី                                                     

ក៏ស្មើគ្មានអ្វីគួរជឿជាក់។

កែវភ្នែកមួយគូធម្មជាតិផ្តល់                                              

មានន័យសែនសល់ជ្រៅមិនរាក់

រហូតសត្រូវដល់មិត្រភក្តិ                                                 

បំផុតគឺអ្នកមានស្នេហា៕ Tue, 22:44-23:18, 07/02/2012

នេត្រាស្នេហ

One Feeling Eyes

ភ្នែកពីរធម្មតាបើប៉ះគ្នា                                                     

មួយគ្រាពុំទាន់ចាប់អារម្ម

លុះញឹកញយដងត្របាញ់ផ្សំ                                            

ភ្នែកពីរមើលចំសម្គាល់កត់។

ថាមុខម្នាក់នេះដូចធ្លាប់ចួប                                              

ពុំចាំចំនួបកាលកំណត់

ម្ចាស់ភ្នែកទាំងពីរមើលម៉ត់ចត់                                     

ក៏បានសន្មតចាំក្នុងចិត្ត។

ម្នាក់សម្លឹងមើលមុនទៅម្នាក់                                            

ម្នាក់ទៀតឃើញជាក់ក៏ផ្តើមគិត

គេនេះមើលខ្លួនក្នុងគំនិត                                                 

របៀបណាពិតទាយពុំដឹង។

ចាប់មានចិត្តគិតទោរទន់ទៅ                                            

ក្រែងគេសាងផ្លូវស្នេហសន្ធឹង

ក៏ដៀងភ្នែកតបឱយដំណឹង                                              

ម្នាក់ទៀតគិតផ្សឹងស្មានថាខ្លួន។

មានគេចាប់ចិត្តប្រតិពទ្ធ                                                   

ចិត្តក៏ធ្លាក់ភ្លាត់ពើបចួបចួន

សមានចិត្តក៏រីកផ្ទួនៗ                                                      

ជាស្នេហដូចសួនផ្កាស្គុះស្គាយ។

ភ្នែកពីរប៉ះគ្នាក៏ចេះតែ                                                     

ចង់ឃើញកៀកក្បែរស្តីនិយាយ

រកគ្នាទៅមកដូចចិត្តទាយ                                                

ថាពិតរីករាយដូចក្នុងភ្នែក។

ពេលចិត្តយល់ចិត្តខ្សែនេត្រា                                            

ឆ្លងឆ្លើយវាចាយល់ពន់ពេគ

សឹងយល់ជាងមាត់ពោលវែកញែក                                    

ពេញចិត្តជជែកតាមនេត្រា។

ពេលវិបត្តិស្នេហភ្នែកទាំងទ្វី                                              

បានឋិតឆ្ងាយពីភ្នែកស្នេហា

លែងមើលក្នុងន័យស្និទ្ធកាយា                                          

ដើរផុតហើយណាទើបសម្លឹង។

អាណិតកែវភ្នែកធ្លាប់មើលគ្នា                                           

ពុំអាចទាមទារយកព្រលឹង

បានត្រឹមលួចមើលកុំឱយដឹង                                           

បានតែប៉ុណ្ណឹងគឺគ្រប់គ្រាន់។

ឱ!នេត្រាស្នេហម្ខាងរៀបការ                                            

ទប់ទឹកនេត្រាឱយរួសរាន់

កុំឱយគេដឹងដេញតាមទាន់                                              

ក្រែងគេអាចភាន់ក្នុងន័យស្នេហ។

យ៉ាងណាក៏ភ្នែកអាចសម្លឹង                                              

ជាចុងក្រោយហ្នឹងសមល្មមដែរ

មើលគេគ្រងរ៉ូបរូបប្រួលប្រែ                                              

ស្រស់ស្អាតប៉ុន្តែកូនកំលោះ។

ពុំមែនម្ចាស់ភ្នែកដឹងក្នុងចិត្ត                                              

គេជាក់មានសិទ្ធិឥតចន្លោះ                      

អាចជ្រើសផ្លូវណាគេស្មគ្រស្មោះ                                       

ចាំឬបង់បោះបំភ្លេចចោល។

ត្រូវទទួលយកកុំប្រកែក                                                   

ថ្ងៃនេះថ្ងៃស្អែកជាស្រមោល

នេត្រាស្នេហផ្ទេរចិត្តដេញដោល                                       

កំហុសត្រូវថ្កោលលើនេត្រា៕ 

Sun, 11:37-13:09, 12/02/2012                                                                                                                                                                                                             

ក្រោយភ្លៀងមេឃក្តៅហែង (Hot Rain)

ធម្មជាតិប្រួលប្រែ

ភ្លៀងធ្លាក់ខុសខែ

ក្តៅខុសរដូវ

ក្រោយភ្លៀងស្រលះ

ប្រែផ្លាស់ស្ងួតផ្លូវ

មួយភ្លេតក៏ត្រូវ

ហួតជាពពក។

ធ្លាប់ភ្លៀងត្រជាក់

សត្វលោកញ័រញាក់

ពួនក្នុងជំរក

ឥលូវភ្លៀងហើយ

ក្តៅពុំអាចជ្រក

ម្លប់ពពកមក

ក៏ខ្មៅជាភ្លៀង។

ភ្លៀងធ្លាប់ប្រយោជន៍

ឥលូវប្រែហោច

លិចផ្លូវបាត់រាង

ទ្រឹស្តីពីមុន

ស្រលះក្រោយភ្លៀង

ឥលូវមិនទៀង

ក្រោយភ្លៀងក្តៅហែង។

មេឃក្តៅសុខៗ

ភ្លៀងប្រាវ!គ្មានផុក

ធ្លាក់ខុសកន្លែង

ម៉ូតូរថយន្ត

ចួនខូចចំបែង

លើផ្លូវខ្វាត់ខ្វែង

ក្រោមមេឃភ្លៀងក្តៅ៕៚

—S. TAY, Thurs. 18:04-18:29, 10/05/2012

សមីការស្នេហ (Love Problem)

Mathematical Love

សមីការស្នេហ           

មានរាងប្រួលប្រែ               

មិនដូចគណិត

អ្នកមានស្នេហា           

សុទ្ធត្រូវស្រាយគិត         

ដំណោះស្រាយពិត

រូបមន្តមិនច្បាស់។

អ្នកប្រាជ្ញរកឃើញ         

របកគំហើញ            

ទ្រឹស្តីបទច្រាស

តែការអនុវត្ត             

ពិបាកពេគណាស់         

ធ្វើតាមចួនខ្លះ

ផលស្នេហផ្ទុយចិត្ត។

អ្នកប្រាជ្ញត្រឹមផ្តល់         

មតិកិច្ចកល             

អនុវត្តត្រូវគិត

កាលៈទេសៈ             

ពេលខុសគ្មានសិទ្ធិ         

បញ្ចេញគំនិត

ប្រឆាំងតវ៉ា។

វិធីសាស្ត្រស្រាយ               

អាស្រ័យលើកាយ         

អ្នកយល់ឥរិយា

អ្នកប្រាជ្ញបានត្រឹម         

ពន្យល់ដោះសា           

ព្រោះសមីការ

ពុំទៀងទាត់ដែរ។

ស្រាយសមីការ           

អញ្ញត្តិស្នេហា            

អាចតិចអាចក្រែល

ចួនគ្មានឫសសោះ         

ចួនច្រើនហូរហែរ               

តែល្អឫសស្នេហ

មានតែមួយគត់។

បើឫសមានច្រើន               

អ្នកស្រាយក្រវើន               

ផ្ទៀងផ្ទាត់អត់ធ្មត់

ប្រហែលបន្តិច           

ខុសលេខរលត់           

តែគ្រោះបំផុត

ឫសស្នេហឈ្លោះគ្នា។

បើឫសសូន្យសោះ         

កំលាំងស្រាយអស់         

បង់ខាតវេលា

ឫសស្នេហមានដែរ         

តែត្រឹមគឺជា             

ឫសស្នេហមានគ្នា

សមីការគេ។

សមីការស្នេហ           

អ្នកផ្សេងត្រឹមតែ          

ជួយគិតនោះទេ

អ្នកស្រាយខ្លួនឯង         

ដោះស្រាយរិះរេ           

ឫសល្អទោរជ្រេ

រកអ្នកស្រាយល្អ៕

—S. TAY, Tue-Wes, ២៣:៣០-០០:១៦, 24-25/04/2012

វ៉ែនតា (Love Version)

                                    

ពេលក្រឡេកឃើញស្រីមាសមេ                    

គន់ឥតធ្វេសធ្វេសឹងមិនព្រិច

តើអូនមែនទេភ្នែកបើកធ្វេច

                             សម្លឹងជានិច្ចសង្ឃឹមស្រី។

ពួកយើងពុំសូវបានចួបគ្នា  

                               ចួបក៏ពំងាអូនមិនស្តី

មិនងើយមើលប្រុសអូនបេតី    

                          ធ្វើដូចមាសមៃមិនស្គាល់បង។

ទីជិតដូចឆ្ងាយសែនឆ្ងាយចិត្ត 

                            ស្នេហមិនបានស្និទ្ធអូនបែរខ្នង

ដើរហួសហើយមិនងាកក្រោយផង  

                 ដួងចិត្តស្នេហស្នងដាច់ក្រៃណា។

លើកនេះឃើញអូនសែនចៃដន់   

                      ដៃស្ទុះស្លោស្លន់ទាញវ៉ែនតា

មើលហើយមើលទៀតផ្ទៀងនេត្រា   

                   ចិត្តសង្ឃឹមថាគឺជាអូន។

មិនទុកចិត្តភ្នែកថែមវ៉ែនតា  

                            នៅតែចិន្តារេដូចក្បូន

សង្ឃឹមទៅជិតចម្ងល់សូន្យ    

                             តែសែនស្រពោនអូនបាត់កាយ។

ចិត្តខ្វល់វិលវល់មើលគ្រប់ទី   

                             មិនឃើញឆវីឱសែនស្តាយ

គឺអូនមែនទេមិនអាចស្រាយ      

                        បើពិតឆោមឆាយបងរីករាយ។

ទោះដឹងថាអូននៅខឹងបង 

                                 តែភ្នែកទាំងសងបានរាប់រាយ

ថាអូនញញឹមស្រស់ប៉ព្រាយ   

                            ហាក់សែនរីករាយពេលឃើញបង។

អូនដឹងថាបងសម្លឹងអូន     

                                ក្នុងកែវភ្នែកស្ងួនយល់បំណង

ថាចិត្តបងនៅមាននួនល្អង  

                                យល់ទង្វើបងពាក់វ៉ែនតា។

ចង់មើលអូនក្នុងនាមគូស្នេហ    

                         ចង់មើលឱយតែឃើញជីវា

ចង់មើលដរាបមាននេត្រា   

                               មើលហើយរក្សាមួយជីវិត៕                                                                                                                   —S. TAY, Sun, 11:03-00:14, 05/ 02/ 2012                                  

អំពើល្អ

អំពើល្អពុំងាយប្រព្រឹត្ត

ទោះចិត្តអបលក្ខណ៍ផ្កប់បន្លំ

ទោះវាគេប្រើដូចរៀបចំ

ក៏ត្រូវរួមផ្សំដោយចិត្តស្មោះ។

ចិត្តស្មោះព្រោះធ្លាប់ធ្វើកន្លង

ថ្វីចិត្តចាំចងតែខ្មៅសោះ

ក៏រំភើបចិត្តក្រំក្រៀមក្រោះ

បើបោះទង្វើតបមិនល្អ។

អំពើល្អដែលធ្វើទៅបាន

សមានចិត្តត្រូវស្មោះសរ

ទើបអ្នកទទួលស្មោះត្រេកអរ

ឬបាតកករមើលពុំដឹង។

ឥទ្ធិពលនៃអំពើល្អ

មនុស្សអាក្រក់ក៏ល្អព្រលឹង

គេធ្វើល្អបើយើងតបផ្សឹង

អាចកើតកំហឹងសក្លាយខ្មៅ។

បើគេសារភាពកំហុសហើយ

យើងបែរកន្តើយនៅចិត្តក្តៅ

គឺយើងចង់ឱយខ្មៅរឹតខ្មៅ

អាក្រក់កម្លៅកែលែងបាន។

មនុស្សអាក្រក់ក៏អាចធ្វើ

អំពើល្អដែលដើរខុសដាន

ព្រោះគេក៏មានញាតិសន្តាន

ទុច្ឆន្ទៈច្រានទើបរើសខុស។

ធ្វើល្អបើផលពុំគាប់ចិត្ត

នោះអ្នកប្រព្រឹត្តតបប៉ុណ្ណោះ

ដែលពុំយល់ន័យទឹកចិត្តស្មោះ

តែអ្នកទាំងអស់អាចច្បាស់ភ្នែក។

អំពើល្អព្រោះពុំគិតផល

ល្អព្រោះអ្នកផ្តល់ពេញចិត្តត្រេក

ក្តីសុខដែលអាចចែករំលែក

ត្រឹមអាចជជែកតាមទង្វើ។

ចួនកាលធ្វើដោយពុំយល់ន័យ

ក៏ចិត្តមានក្តីគិតអើពើ

មនុស្សដូចគ្នាធ្វើបានធ្វើ

នៅលើផែនដីវិលព្រោះវា។

ផែនដីដើរព្រោះអំពើល្អ

មនុស្សធ្វើបន្តៗគ្នា

មានអ្នកបំពានជួយរាំងរា

គឺជាការងារជួយមនុស្សជាតិ៕

តៃ សុវណ្ណារុណ

ព្រហស្បតិ, ២១:២៤-២២:៤៧, ១៩/ ០៤/ ២០១២                                        

មុនចូលឆ្នាំ

ជិតចូលឆ្នាំហើយ គិតដល់អូន

គួរមានអ្វីជូន ត្រឹមតាមសារ

ជូនពរចូលឆ្នាំ ទោះជីវា

មិនតបវាចា ក៏មិនថ្វី។

ផ្ញើព្រោះដឹងថា បើមិនផ្ញើ

ស្នេហយើងនឹង ដើរដល់វិថី

ចែកជាពីរផ្លូវ ទិសទីទៃ

រិតដើរមាសមៃ រិតឆ្ងាយបង។

តែទោះបងផ្ញើ ក៏ប្រហែល

អូនចាកចេញដែរ ព្រោះនួនល្អង

ហាក់ចង់បញ្ចប់ ការទាក់ទង

ស្នេហបងស្នេហស្នង អូនស្តាយក្រោយ។

ពេលជិតចូលឆ្នាំ បងឃើញអូន

ប្រហែលឃើញអូន លើកចុងក្រោយ

ក្រោយចូលឆ្នាំហើយ អាចត្រាណត្រើយ

ចេញចាកទៅឆ្ងាយ យូរចួបគ្នា។

បងមើលមុខអូន អូនឱនមុខ

ទឹកមុខលាក់ទុក កលមាយា

មានចិត្តមិនស្មោះ ស្មោះពំងា

ច្បាស់ស្មោះក្លាយជា ស្មោះឥតន័យ។

ស្មោះអូនទោះអូន មិនចង់ស្មោះ

មិនចង់បង់បោះ ទោះរីងរៃ

បើស្នេហយើងពិត ស្នេហប្រពៃ

គ្មានឧបសគ្គអ្វី អាចជ្រៀតជ្រែក។

បើរឿងតិចតួច អាចបំផ្លាញ

នោះក្តីស្រឡាញ់ សមទឹកភ្នែក

ទោះគ្មានហេតុផល ត្រូវវែកញែក

ក៏លេសក្រោមមេឃ អូនរកបាន។

ជ្រល់ចិត្តស្រឡាញ់ មិនអន់ចិត្ត

ស្រឡាញ់វរមិត្រ មិនត្រឹមប្រាណ

ទោះមុនចូលឆ្នាំ អូនទុកដាន

ត្រឹមនាំរំខាន ផ្លូវចិន្តា។

ចង់ចួបអូនទោះ អូនមិនចង់

ស្នេហលិចមិនស្រង់ ក្បដអាត្មា

អ្វីអាចធ្វើបាន ធ្វើហើយណា

ដើម្បីស្នេហា រស់មុនស្លាប់៕

―S. TAY, Fri, 17:15-18:22, 06/04/2012

ចាំ (STILL)

ពេលនៅចំពោះមុខមាសមេ
មិនដឹងខ្លួនទេថាចិត្តចាំ
ចាំជាប់ក្នុងចិត្តដិតចំណាំ
ផលកើតគ្មានកម្មផ្ទុយការពិត។
ចាំស្នាមញញឹមថែមសំណើច
គ្រាន់មើលអូនសើចដឹងគំនិត
យល់ទើបបេះដូងប្រកាសចិត្ត
គ្រប់ស្នាមដាមដិតអូនតួឯក។
មិនចង់ឱយឆ្ងាយទាំងចិត្តកាយ
បាត់អូនមិនណាយចិត្តរកស្រែក
តាមរកមាសមៃមិនអល់អែក
ផ្លូវហាក់ចម្លែកពេលគ្មានអូន។
រកអូនទោះចិត្តមិនសង្ឃឹម
នឹកស្នាមញញឹមចិត្តមិនសូន្យ
សែនឯកាចិត្តមិនរលូន
ចង់ប្រាប់ទៅអូន I love you ។
រកអូនមិនឃើញបានត្រឹមចាំ
ចាំទាំងប្រេះស្រាំចិត្តមិនធូរ
រហូតស្ងាត់មនុស្សនៅចាំគូ
ទោះវេលាយូរសំខាន់ចួប។
I want you to stay in my heart;
I want to start our love;
I STILL wait for you my love!;
It’s not just love …STILL love.
ចង់មិនត្រឹមតែចាំក្នុងចិត្ត
ចង់ដោយស្នេហពិតរស់រួមរួប
បានត្រឹមចាំក៏ចាំចំនួប
សុំអាចជូនរូប To My Eyes… ៕
―S. TAY, Wes, 23:00, 21/03/2012-Thurs, 00:14, 22/03/2012

យុវជនក្នុងបុព្វហេតុអប់រំ

យុវជនគឺជាកម្លាំងរដ្ឋ

ជាតិដើរទៀងទាត់ដ្បិតយុវជន

សសរទ្រូងឈររឹងឬទន់

ការងារស្រាលធ្ងន់យុវជនទ្រ។

ទំពាំងត្រូវស្នងដើមឫស្សី

ឫស្សីត្រូវលៃគិតជំហរ

ព្រោះទំពាំងក្រោយអាស្រ័យឈរ

សុខឬវឹកវរខ្លួនអ្នកនាំ។

ឫស្សីល្អទើបទំពាំងល្អ

ទំពាំងត្រេកអរឫស្សីមាំ

បើឫស្សីខូចរលួយខ្ទាំ

ទំពាំងពិតគ្រាំដ្បិតឫស្សី។

ដែកប្រើការបានត្រូវលត់ដំ

យុវជនឧត្តមអប់រំស្តី

កត្តាជុំវិញល្អប្រពៃ

ទើបមានវិន័យជាគំរូ។

កត្តាជុំវិញតែមួយយ៉ាង

ពុំអាចកសាងទោះពេលយូរ

កត្តាផ្ទាល់ខ្លួនផ្គុំជាគូ

មានការតស៊ូទើបមានផល។

អប់រំខ្លួនឯងដោយសិក្សា

ប្រើស្មើនេត្រាស្រាយចម្ងល់

អប់រំសីលធម៌ជាកំណល់

ចរិយាពិតដល់មុនចំណេះ។

អប់រំវិជ្ជាស្មើជាស្ពាន

ការសិក្សារៀនពឹងតម្រិះ

អ្នកបានឆីគឺអ្នកប្រលេះ

អ្នកឡើងបានបេះចាប់ពីទាប។

មានវិជ្ជាហើយផ្សាយបន្ត

គំនិតមិនក្រខុសរបៀប

ចាយច្រើនចេះច្រើនពោរពេញព្រៀប

ចំណេះជាប់ជ្រាបនៅក្នុងប្រាណ។

បើពុំអាចបានអប់រំគេ

ក៏ត្រឹមរិះរេជួយខ្លួនបាន

អាចទុកស្នាដៃតសន្តាន

រលកក្រោយច្រានរលកមុខ៕—S. TAY, Thurs, 15/03/12, 23:04-23:56