ឃើញសកម្មភាពស្រីមាសមេ
នេត្រាទាំងទ្វេមិនហ៊ានព្រិច
ច្រើនដងហើយដែលមាសស្ងួនគេច
បែរមុខបំភ្លេចប្រុសអូនស្នេហ។
អូនធ្លាប់មើលមុខប្រុសម្នាក់នេះ
ប្រើភ្នែកពិសេសចំពោះតែ
រូបបងម្នាក់ទេឥលូវប្រែ
ខួរក្បាលត្អូញត្អែរពេលចិត្តគិត។
ពេលនេះមានតែម្ខាងសំលឹង
ម្ខាងទៀតផ្ទុយផ្សឹងប្រល័យចិត្ត
ដែលគិតពេលឃើញស្តែងពិតៗ
ភ្នែកយល់គំនិតក៏រាយកាណ៌។
ចិត្តបានដឹងហើយបន្ទោសភ្នែក
គួរជួយរំលែកទុក្ខស្នេហា
ដោយកុំពាំរូបនាំឈឺផ្សា
អ្នកត្រូវដឹងថាចិត្តអ្នកឈឺ។
តែភ្នែកមិនក្រោមបទបញ្ជា
នៅតែពុះពារសង្ឃឹមភ្លឺ
ផុតអន្ធការយល់ពន្លឺ
ចង់ជាជំងឺកុំគេចវេះ។
ទោះមើលនឹងភ្នែកឈឺនឹងចិត្ត
សង្ឃឹមអាណិតប្រុសម្នាក់នេះ
អាណិតភ្នែកស្នេហមិនទាន់ប្រេះ
អាណិតស្នេហច្រេះមិនទាន់ស្លាប់…៕
—S. TAY, Fri, 23:37-00:11, 18/05/2012
Source: មើលនឹងភ្នែក ឈឺនឹងចិត្ត
ទំព័រដួងចិត្តកវី 