កាលមិនទាន់ដឹងស្រឡាញ់ពិត
មិនគិតថាចិត្តធ្វើទុក្ខខ្លាំង
ពេលអូនមានថ្មីស្នេហប្រតិកម្ម
ទើបជឿកម្លាំងនៃស្នេហា។
មិនអាចធម្មតាពេលឃើញស្រី
ក្បែរប្រុសដទៃជាសង្សារ
ទោះគេមិនមែនជារៀមរ៉ា
ទាស់នៅត្រង់ថាអូនយល់ព្រម។
អូនមានថ្មីទាំងមិនប្រាប់បង
ក៏ព្រោះនួនល្អងខឹងខ្លាំងល្មម
ងរហើយមានថ្មីឱយស្នេហស្គម
មិនហ៊ានប្រឈមនឹងប្រុសចាស់។
មានអ្វីមិនត្រូវបើហ៊ានធ្វើ
មានអ្វីត្រូវរើបើត្រូវច្បាស់
មានស្នេហថ្មីហើយអ្វីត្រូវខ្មាស
អ្នកត្រូវអាម៉ាសគឺរូបបង។
បងមានតែធ្វើដូចគ្មានអ្វី
កើតឡើងប្រក្រតីគ្មានសៅហ្មង
ទាំងពិបាកទ្រាំមិនបានផង
មើលមាសនួនល្អងមានស្នេហា។
ពួកយើងក៏គ្មានអ្វីសំអាង
ថាមានភស្តុតាងជាសង្សារ
អូនមិនទាក់ទងបងឯណា
មានតែមិនចារជារូបភាព។
មានតែក្នុងចិត្តដ៏តិចតួច
មានរឿងក៏ស្តួចស្តើងទន់ទាប
មិនសប្បាយចិត្តក៏រៀនប្រៀប
បងមានអ្វីធៀបនឹងរូបគេ។
ក្រៅពីខូចចិត្តនៅរីករាយ
អាចញញឹមលាយមិនធ្វើទេ
គ្រាន់តែមិនដែលបានសរសេរ
ព្រោះស្នេហមាសមេមិនដឹងច្បាស់៕៚
សៅរ, ២២:៣២–២២:៤៨, ២៣/០៣/២០១៤
ទំព័រដួងចិត្តកវី 