ពាក្យកុហកចេញពីមាត់អូន
ជាពាក្យដែលស្ងួនពោលខុសចិត្ត
ពេលបងប្រកាសប្រាប់ស្នេហពិត
ហាក់ដូចវរមិត្រមិនជឿជាក់។
ទាំងអូនបានដឹងចម្លើយបង
ស្រឡាញ់ស្នេហស្នងមិនអាចលាក់
ដឹងតែធ្វើពើចិត្តវរលក្ខណ៍
ចង់ឱយបញ្ជាក់ពាក្យប្រាប់ផ្ទាល់។
បងក៏ឱនខ្សឹបដាក់ក្រចៀក
បន្លឺពេចន៍ពាក្យស្នេហនិម្មល
ស្រីណាក៏ដោយក៏ចង់យល់
ហាក់សែនអំពល់បើមិនឮ។
ចាំសម្លេងអូនថាកុហក
ចាក់ជាប់ដាមដក់នៅតែភ្លឺ
ឱយស្នេហរិតតែមានពន្លឺ
ស្រីដូចអូនគឺគ្មានទីពីរ។
សម្លេងនេះនៅតែឋិតថេរ
ប្រែតែមាសមេទេឆវី!
បងចាំរាល់អនុស្សាវរីយ
តែមាសទេពីប្រឹងបំភ្លេច។
គួរប្រាប់វិធីបំភ្លេចផង
នៅពេលនួនល្អងអូនកំទេច
ស្នេហបងដែលអូនប៉ងកែគេច
បងចាំជានិច្ចភ្លេចម្តេចបាន។
បើភ្លេចបានមិនមែនស្នេហា
គឺចិត្តសាវាអ្នកប្រែប្រាណ
បើសិនអូនអាចគឺកល្យាណ
ជាមនុស្សសាមាន្យគ្មានចិត្តស្មោះ។
បើស្មោះម្តេចអូនអាចមានថ្មី
បងល្ងង់ជឿស្រីខុសទាំងអស់
ស្នេហជ្រុលជាជូនទៅសូន្យសោះ
សុំត្រឹមស្រណោះថាអូនល្អ៕
ពុធ, ២២:២២–២២:៤២, ១៣/០៣/២០១៣